PANTUN URANG BUJANG (bahasa banjar)

Itik angsa itik japun,
Ayam kampung putih hintalunya,
Umai bungasnya pupur maambun,
Siapa jua nang ampunnya,
(LPBB/Deden Zabuk Al-Pantun Banjari)

Manisnya mangga din darat,
Siapa jua ampun tanaman,
Manisnya ading batahi lalat,
Bulihkah abang batakun ngaran,
(LPBB/Deden Zabuk Al-Pantun Banjari)

Maksud hati tulak maunjun,
Sayang kadada umpannya,
Amun bulih abang batakun,
Ading bungas siapa ampunnya,
(LPBB/Deden Zabuk Al-Pantun Banjari)

Matan mana punai tarabang,
Matan jambatan nang batiti,
Matan mana datangnya sayang,
Matan mata turun ka hati,
(LPBB/Deden Zabuk Al-Pantun Banjari)

Burung halang burung kaliyangan,
Tinggi tarabang ka angkasa,
Kambang mawar dalam jambangan,
Bulihkah kumbang hinggap di sana,
(LPBB/Deden Zabuk Al-Pantun Banjari)

Lamun hari ngini hari jumahat,
Banyak haji babaju jubah,
Lamun ada cinta tatambat,
Cinta di hati jangan diubah,
(LPBB/Deden Zabuk Al-Pantun Banjari)

Kambang mawar di pakarangan,
Kambang rampai baguyang-guyang,
Bamalaman manahan karindangan,
Mangganang ading nang disayang,
(LPBB/Deden Zabuk Al-Pantun Banjari)

Nyaman mamakan karak nasi,
Makan karak batambah pulang,
Awan bajalan nang ditangisi,
Kakasih jauh di banua urang,
(LPBB/Deden Zabuk Al-Pantun Banjari)

Asam pauh dalima pauh,
Rama rama batali banang,
Abang jauh ading gin jauh,
Sama-sama kita mangganang,
(LPBB/Deden Zabuk Al-Pantun Banjari)

Matan rumah ka pasar hanyar,
Ular lidi masuk ka liang,
Bumi didabuk langit ditampar,
Si jantung hati diambil urang,
(LPBB/Deden Zabuk Al-Pantun Banjari)

Malam ngini mamasak tungkul,
Isuk mamasak hundang galah,
Malam ngini kita bakumpul,
Isuk kita sudah bapisah,
(LPBB/Deden Zabuk Al-Pantun Banjari)

Nukar sumangka di pasar kamis,
Dimakan baimbai dalam parahu,
Di luar tawa di dalam tangis,
Allah Ta'ala nang pasti tahu,
(LPBB/Deden Zabuk Al-Pantun Banjari)

Tiup api di gunung lidang,
Habu habunya kutampi jua,
Niat hati salagi bujang,
Balu-balunya kuhadang jua,
(LPBB/Deden Zabuk Al-Pantun Banjari)

Ada laus ada pang janar,
Gasan bumbu nintu gunanya,
Umai ading nang bungas langkar,
Bulihkah abang tahu ngarannya,
(LPBB/Deden Zabuk Al-Pantun Banjari)

Waluh sabalah bayam saikat,
Gangan manis jadi masakan,
Hanyar sakali abang malihat,
Hati abang kada karuan,
(LPBB/Deden Zabuk Al-Pantun Banjari)

Iwak haruan kulihan maunjun,
Tulak maunjun matan baisukan,
Lamun abang bulih batakun,
Siapa jua ampun larangan,
(LPBB/Deden Zabuk Al-Pantun Banjari)

Kambang mawar harum baunya,
Putik satangkai jadi pajangan,
Hati abang liwar himungnya,
Ading bungas masih saurangan,
(LPBB/Deden Zabuk Al-Pantun Banjari)

Kambang mawar makarlah sudah,
Banyak kumbang badatangan,
Abang supan handak bapadah,
Takutan batapuk sabalah tangan,
(LPBB/Deden Zabuk Al-Pantun Banjari)

Kambang malati kambang mawar,
Kambang matahari kuning warnanya,
Makan haja tarasa hambar,
Lamun tabayang rupanya ading,
(LPBB/Deden Zabuk Al-Pantun Banjari)

Buah nangka buah alpukat,
Tumbuh subur di tanah rata,
Bapijim mata tarasa barat,
Rupa ading di palupuk mata,
(LPBB/Deden Zabuk Al-Pantun Banjari)

Mardu tadangar suara suling,
Mata rait balalu taguring,
Guring abang mamagut gaguling,
Asa abang mamagut ading,
(LPBB/Deden Zabuk Al-Pantun Banjari)

Batang latung batang paikat,
Paikat malilit di puhun paring,
Rambut panjang maikal mayang,
Kaya putri matan kayangan,
(LPBB/Deden Zabuk Al-Pantun Banjari)

Putik tujuh daun sirih,
Sampuk urat nang utama,
Muha putih mulus barasih,
Kaya malihat bulan purnama,
(LPBB/Deden Zabuk Al-Pantun Banjari)

Simpun duduk basila di lantai,
Mandangar patuah abah tasayang,
Awak langsing tinggi samampai,
Pinggang halus sakacak lawang,
(LPBB/Deden Zabuk Al-Pantun Banjari)

Bantang kain layar dibantang,
Tulak balayar ka pulau subarang,
Bibir tipis bagiuncu habang,
Hidung mancung nyaman dipandang,
(LPBB/Deden Zabuk Al-Pantun Banjari)

Tabang paring diulah lanting,
Lanting ditambat di sungai paring,
Lamun sudah malihat ading,
Asa nyaman abang guring,
(LPBB/Deden Zabuk Al-Pantun Banjari)

Tangan tacucuk mawar baduri,
Luka badarah balumlah karing,
Handak jua bawani diri,
Manjadi jantung hati si adiung,
(LPBB/Deden Zabuk Al-Pantun Banjari)

Tulak bagawi satiap hari,
Rajaki halal nang dicari,
Kadada janjiu nang abang bari,
Cinta sajati pasti dibari,
(LPBB/Deden Zabuk Al-Pantun Banjari)

Ukur panjang mamakai dapa,
Dipakai urang matan bahari,
Jangan ading mamandang rupa,
Rupa bisa haja mambunguli,
(LPBB/Deden Zabuk Al-Pantun Banjari)

Tulak ka kampung matan kuta,
Handak baburu burung balibis,
Jangan jua mamandang harta,
Harta di dunia bisa habis,
(LPBB/Deden Zabuk Al-Pantun Banjari)

Pisang manurun diulah kolak,
Pisang dihiris dibalah-balah,
Lamujn ading mamandang akhlak,
Insya Allah mambawa barkah,
(LPBB/Deden Zabuk Al-Pantun Banjari)

Aku tahu sarang wanyi,
Sarang wanyi di puhun jambu,
Aku tahu nang ikam handaki,
Nang dihandaki cucu panghulu,
(LPBB/Arul Kdg)

Hibak sapah imbah manginang,
Bibir habang pina manarang,
Rasa lapah aku mangganang,
Nang diganang kada mangganang,
(LPBB/Arul Kdg)

Ampun siapang hamburan gayang,
Jangan dibuang ka dalam batang,
Lamun yayang bujuran sayang,
Napa yayang balum badatang,
(LPBB/Incus Fatih)

Jangan gayang buang ka batang,
Atawa di bawah tuyukan kayu,
Napa kanda balum badatang,
Pulau gatah baluman payu,
(LPBB/Incus Fatih)

Patik kacapi iringi lagu,
Lagu matan bisikan kalbu,
Ampun hatiku apa habarmu,
Aku di siya tarus marindu,
(LPBB/Arul Kdg)

Baju batik kain basulam,
Dipakai gasan pangantinan,
Duduk taungut di atas tilam,
Mangganang kanda sabaisukan,
(LPBB/Risa Agustina)

Burung kalahiyang babuka halar,
Warna bulu mirip kutilang,
Uyy yayangku apa habar,
Rindu kaka sampai ka tulang,
(LPBB/Incus Fatih)

Burung kalahiyang hinggap di tanah,
Handak mamakan daun tiwadak,
Lamun yayang handak ka rumah,
Bawa akan ulun wadai martabak,
(LPBB/Incus Fatih)

Daging layat ngalih diigut,
Ngalih diigut tawak ka tawing,
Malam minggu duduk taungut,
Bakas kakasih isuk basanding,
(LPBB/Lisa)

Malihat almanak di hari sabtu,
Basiap diri aksi wan gaya,
Malihat jam mahitung waktu,
Bajanjian malming di dunia maya,
(LPBB/Risa Agustina)

Tinggi tinggi si puhun pinang,
Tinggi tarabang si burung halang,
Mata tapijim hati mangganang,
Dandaman kanda di rantau urang,
(LPBB/Diank Ratu)

Ampar tikar di atas gayang,
Hampang lalangit pasang di batang,
Biar bapangsar tatap ai sayang,
Dalas hangit kada mambuang,
(LPBB/Arul Kdg)

Ka balakang rumah manabang paring,
Imbah ditabang lalu dibalah,
Asa supan aku maniring,
Gulu mahabang rambutnya basah,
(LPBB/Ivan Balangan)

Basapida mutur mereknya hunda,
Tulak satumat ka rumah hanapi,
Lamun cinta tatambat di dada,
Siang taganang malam tamimpi,
(LPBB/Diank Ratu)

Sungai daras dalam banyunya,
Sambil balarut manajak lanting,
Babaya bungas umai sumbungnya,
Aku marawa inya bapaling,
(LPPP/Zhulax Engot)

Iwak cupang iwak kalatau,
Jantik jantik jadi pang umpan,
Hati pusang pikiran layau,
Handak batamu malapas dandaman,
(LPBB/Amank Jefry)

Iwak haruan iwak saluang,
Umpani baras wan hulat bumbung,
Dalam mimpi tarus tabayang,
Ading nang bungas urang balitung,
(LPBB/Amank Jefry)

Pisang kada sumbarang pisang,
Pisang ulih ulih matan jakarta,
Datang kada sumbarang datang,
Kaka datang mambawa cinta,
(LPBB/Amank Jefry)

Handak kutabang si batang manggis,
Puhun manggis babuah jarang,
Kusayang bangat si ading manis,
Ading manis mamilih urang,
(LPBB/Sabran Tiga Empat)
Malam isuk malam sabtu,
Malam isuknya malam minggu,
Tapuk bantal sambat ngaranku,
Di dalam mimpi kita batamu,
(LPBB/Zhulax Engot)

Jalan batiti turun ka batang,
Jangan bahindik titiannya patahan,
Bulan safar kanda badatang,
Bulan mulud kita banikahan,
(LPBB/Abdul Aziz)

Sakit mata talalu ditiringi,
Manuntun tipi layar sadapa,
Biar sajuta biunian mangulilingi,
Hatiku tatap sagan dinda,
(LPBB/Abdul Aziz)

Sungsungi guring jangan balandung,
Kaina bangunnya kasiangan,
Adinda batahi lalat di hidung,
Bakaning tabal kakanda dandaman,
(LPBB/Abdul Aziz)

Manis masam nangka kulanda,
Diulah jus liwar nyamannya,
Sahari kada batamu dinda,
Sarasa satahun manggaringnya,
(LPBB/Abdul Aziz)

Gatal takana batang kaladi,
Bahimat manggaru sampai badarah,
Basungsung hari sudah mandi,
Handak badadai di muka rumah,
(LPBB/Abdul Aziz)

Tagugur halang taranjah balam,
Wayah badua tarabangan,
Tabujur tahalang barabah di tilam,
Mangganang ading kada baguringan,
(LPBB/Sabran Tiga Empat)

Maulah atang tatak bahalang,
Kayu maranti jadi pilihan,
Ulun datang handak bailang,
Handak mambawa’i ading bakunjangan,
(LPBB/Moldi Haza)

Kayu katapi di higa buluh,
Kayu kuini di higa paring,
Kuparaki inya bajauh,
Kutakuni inya bapaling,

Nasib urang kada bungas ne , diacuhakan binian tarus,, Heee e e e e
(LPBB/Sabran Tiga Empat)

Burung piungut hinggap di tihang,
Tinggi di awan tarbang sakawan,
Duduk maungut basangga wihang,
Hati dandaman kupandang bulan,
(LPBB/Sabran Tiga Empat)

Waluh masak nyaman digangan,
Sambal acan papuyu baubar,
Ulun dandaman ulun karindangan,
Saharian kakanda kadada habar,
(LPBB/Risa Agustina)

Amun handak ka rumah nini,
Bawa baras dalam karanjang,
Amun pian sudah babini,
Kanapa jadi bapadah bujang,
(LPBB/Risa Agustina)

Paraya pian bakaca mata,
Amun kada jua bajalanan,
Paraya abang bapadah cinta,
Mun kada wani ka palaminan,
(LPBB/Risa Agustina)

Puhun mati dimakan binalu,
Putik binalu buat di kain,
Aduhayy hati tarasa pilu,
Malihat abang mangganding nang lain,
(LPBB/Diank Ratu)

Ambil jamuran kain lalu dilipat,
Disusun rapi dalam karanjang,
Sudah lawas kita kada badapat,
Satiap hari hati mangganang,
(LPBB/Diank Ratu)

Mati unggas ulih pamburu,
Unggas dibungkus dalam kain,
Hati panas rasa camburu,
Abang marayu binian lain,
(LPBB/Risa Agustina)

Kuluk-kuluk harinya hujan,
Harinya hujan lakasi bataduhan,
Tuhuk sudah ulun manyandang,
Manyandang hati nang karindangan,
(LPBB/Agus Agenaza)

pantun manggumbal binian nah buhannya ai,,,

Batang latung batang paikat,
Paikat malilit di puhun paring,
Alis mata nang hirang labat,
Kaya samut bajalan bairing,

Batang puhun tinggi manjulang,
Tumbuh labat di dalam hutan,
Rambut hirang maikal mayang,
Kaya putri matan kayangan,

Ambil tujuh si daun sirih,
Sampuk urat nang utama,
Muha putih wan barasih,
Kaya malihat bulan purnama,

Duduk batalimpuh simpun di lantai,
Mandangar patuah uma tasayang,
Awak langsing tingggi samampai,
Pinggang halus sakacak lawang,

Bantang kain layar dibantang,
Tulak balayar ka pulau subarang,
Bibir tipis bagincu habang,
Hidung mancung nyaman dipandang,

(LPBB/Deden Zabuk Al-Pantun Banjari)

Buah nangka balah wan parang,
Biginya jangan di buang,
Lawas dinda mahadang-hadang,
Sakali datang sudah ampun urang,
(LPBB/Ulvie)

Lamun ading bisa malukis,
Tulung lukisakan puhun kayu,
Lamun ading bisa bahasa inggris,
Tulung artiakan kata Ai lap yu,,,

Lamun ading bisa manari,
Tulung manari japin rantauan,
Lamun ading bisa manamba'i,
Tulung tamba'i hatiku nang dandaman,,,

Ahayyyy,,,,karindangan bin dandaman jar lakunnya,,,,gkgkgk
(LPBB/Deden Zabuk)

Nasi karing pina bakarak,
Buat di panci andak di atang,
Jangan pina wani baparak,
Lamun kada wani badatang,
(LPBB/Lisa)

Matan hulu kerumah nini,
Lapah bajalan paksa ditandu,
Matan dahulu sampai wahini.
Masih pian nang ulun rindu,
(LPBB/Lisa)

Mambawa paring hagan maulah kalayangan,
Ulah akan dandang suruh dikaliri akan,
Kada kawa guring lantar mangganang,
Nang di dandam sudah mangaruh baliuaran,
( LPBB/Agus Agenaza)

Malam ni malam jumahat,
Kada banyak nang bagadangan,
Hari ni tadi sudah pang badapat,
Tatap ja hati masih dandaman,
Huuhuuuuyyy....
(LPBB/Agus Agenaza)

Hari arba manukar parkutut,
Manukar parkutut parkutut bini,
Hari dingin apa nang dipagut,
Pagut gaguling asa mamagut bini,,,

Asa iya ai sudah mahayal lakunnya,,,Hati2 bungkas baluang gaguling bubuhannya ai,,,,

Hahahaha,,,,,
(LPBB/Deden Zabuk)

Hari selasa batukar iwak,
Barat mambawa batis tasulaid,
Asa dingin sabijian awak,
Mandangar kaka mambaca maulid,
(LPBB/Lisa)

Assalamualaikum,,,

Saputaran hulu nah,,,

Main gasing di pakarangan,
Gasing matan kayu kamuning,
Camburu nintu bumbu pacaran,
Camburu nintu tandanya sayang,

Rami bagasing wan kakawanan,
Kada tarasa sampai kamarian,
Lamun limpat panimburuan,
Bisa marusak lawan hubungan,

Jadi kada baik jua buhannya ai mun camburu kada baalasan tu,,,

(LPBB/Deden Zabuk Al-Pantun Banjari)

Di pamatang banyak hirangan,
Di pingkalung si anak warik,
Aku mahadang kada kahadangan,
Nang dihadang kadada malirik,
(LPBB/Putra Banua)

Anta anti.
Kataku si burung nuri.
Aku lakian nang jaya sakti.
Galuh datang maharit rindang hati.
(LPBB/Sabran Tiga Ampat)

Habang hijau buah rambutan,
Si antalagi manis rasanya,
Hati manangis marga dandaman,
Asa tabayang lawan rupanya,

Badarah lakunnya dandamannya ni buhannya ai,,,hehehe
(LPBB/Deden Zabuk Al-Pantun Banjari)

Kaparingin katabuniau,
Puhun rambutan batang nya karas
Ulun guring ta'igau igau
Tapikirakan kaka nang Duda lawas,
(LPBB/Ulvie)

Asam pauh dalima pauh,
Buah kurma di dalam pati,
Pian jauh ulun jauh,
Sama-sama kita manjaga hati,
(LPBB/Agus Agenaza)

Malam ngini malam kamis,
Malam isuk malam jumahat,
Ayank jangan tarus manangis,
Mudahan isuk kita kawa badapat,

Aisitiru jar kisahnya... Akkaaaaiii yaaaahhh....
(LPBB/Agus Agenaza)

katutupi hinggap di tawing,
Kulai-kulai makan di upih,
Gawil pipi ading bapaling,
Japai-japai ading baalih,
(LPBB/Sabran Tiga Empat)

Bagusnya rambut nangkaya mayang,
Nangkaya mayang rambut paninian,
Handak haja bapadah sayang,
Tapi supan ulun babinian,
(LPBB/Lisa)

Batanda lahir parak di hidung,
Saganal sahang bawarna hirang,
Adinda nang batahi lalat di hidung,
Nintu adinda nang kusayang,

Dasar bungas pang galuhnya, tahi lalatnya nintu nang maulah diaku karindangan,,akayyyyaahh
(LPBB/Abdul Aziz Al Jaboeli)

Rambut baurai bahias pita,
Bamata lantik pina mangkilat,
Lamun hudah jatuh cinta,
Gula habang barasa cukla,t

Ahahahayyy dandaman pulang lakiannya
(LPBB/Abdul Aziz Al Jaboeli)

Binuang rantau bakasananya kandangan,
Bakasinya lagi nintu mataraman,
Ikam jauh kakanda karindangan,
Rahatan batamuan lalu ai basayangan,

Akaaayyyyy malapas rindu jar lawas kada batamu..
(LPBB/Abdul Aziz Al Jaboeli)

Madam kahulu manuju kamahi,
Basinggah satumat di amuntai hulu,
Rahatan hujan turun mambasahi,
Hati dandaman lawan ayangku,

Taksi basinggah panumpang baturun,
Batinggal di mutur urangnya batalu,
Sabanyak titikan banyu hujan nang turun,
Saitu jua cintaku wan dirimu,

Akaaayyylahhh talului galung paninian,,,
(LPBB/Abdul Aziz Al Jaboeli)

Tulak mancari si ranting jambu,
Ranting ditatak gasan balugu,
Malam ini si malam minggu,
Malam nang sadih buat nang jumblu,

Sabar æ anu æ,,,
(LPBB/Sabran Tiga Empat)

Itik surati babaris saparanakan,
Itik japun jalan bainggang,
Duduk maungut sambil bapisbukan,
Mahadangi kalu digawil ayang,

Wkwkwk,,,,lamun kada digawil jua pacangan kada guring saku ah,,,
(LPBB/Deden Zabuk)

Sudah baamas baintan pulang,
Sudah babungas baiman pulang,

Sudah basirih bakapur pulang,
Sudah baputih basubur pulang,

Sudah balampit batikar pulang ,
Sudah baduit balangkar pulang,

Sungai sungai sungai di mana hulunya,
Umai umai umai siapa judunya ???

(LPBB/Sabran Tiga Empat)

Buah tiwadak masak di puhun,
Aku naiki gugur ka kandang,
Aku handak, ikam hakun,
Napa lagi nang dihadang,
(LPBB/Zhulax Engot)

Labih baik basurban kaci,
Daripada surban sumbarangan,
Labih baik bakurban sapi,
Daripada kurban parasaan,

He he he ,,,,
(LPBB/Sabran Tiga Empat)

Di hatap rumah tikus basarang,
Hatap rumahnya bakayu jati,
Duduk maungut di muhara lawang,
Kaingatan muha pujaan hati,
(LPBB/Lisa)

Nasi panas peda baubar,
Gangan nangka iwak saluang,
Walaupun lawas kedada habar,
Jangan dikira aku membuang,
(LPBB/Zhulax Engot)

Tangah hari maunjun lundu,
Maunjun lundu sampai ka balangan,
Lamun cinta sudah bapadu,
Siap siap mambagi undangan,
(LPBB/Lisa)

Ka masjid raya liwat taluk dalam,
Tulaknya bakandaraan kadanya babukah,
Hari hari kaganakan wan ikam,
Nang diganang marasa juakah,,?

Ikam bungas bagus parangainya,
Siapa haja mandapatkan bauntung,
Kada kawa dapat urangnya,
Baisi futunya gin untung,

akaaayyy jatuh cinta jar,,
(LPBB/Abdul Aziz Al Jaboeli)

Dinginnya hari pas turun salju,
Di dalam salju tatamu amas,
Jangan pian pina maraju,
Lamun maraju kada bungas,
(LPBB/Lisa)


Batanam waluh tumbuhnya subur,
Nang batanam ngarannya hindun,
Hati ulun barasa tahambur,
Mandangar pian mamagat ulun,
(LPBB/Lisa)

Kambang nang mulik damintu indah,
Damintu indah ditiup angin,
Tumbang-tumbalik aku manyasah,
Nang aku sasah pilih nang lain,

Aku nang mananam urang nang mamutik,
Aku nang mamulut urang nang manangkap,
Aku nang bamasak urang nang mamakan,
Aduh aduh sakit karunyutan nang kaya tumbal marantan,

(LPBB/Sabran Tiga Empat)

Ambil tapih di rumah pian,
Handak ma'ambil tangan batadah,
Umai kaka bungasnya pian,
Jantung di dada sarasa bapindah,
(LPBB/Lisa)

Putik kenanga hari salasa,
Imbah mamutik bukahnya laju,
Hintalu masin kada barasa,
Wayah pujaan hati lagi maraju,
(LPBB/Lisa)

Tatak paikat dibalah-balah,
Disusun rapi basulah-sulah,
Batis baangkat mengetek sabalah,
Manginum kupi ruku sabilah,
(LPBB/Putra Banua)

Malam Minggu ya malam Ahat,
Malam Rabu ya malam Arba,
Ikam kutunggu kada talihat,
Aku rindu di dalam dada,

Gara2 manahan rindu dalam dada, sampai mariga, muntung bau naga. Heee
(LPBB/Sabran Tiga Empat)

Makan siang baiwak samu,
Samu disanga,ampalam dihiris,
Saminggu sudah kada batamu,
Rindu hati sarasa dihiris,
(LPBB/Lisa)

Patah batis hancap diurut,
Awak panas barasa ladar,
Nasi saganggam kanyanglah parut,
Lamun kakasih mambari habar,
(LPBB/Lisa)

Rumbai-rumbaian si banang habang,
Banang nang habang sulaman galuh,
Kawai-kawaian bapandang sayang,
Bapandang sayang tumatan jauh,
(LPBB/Sabran Tiga Empat)

Panjang-panjang si kacang panjang,
Tanam di padang di higa pisang,
Hadang-hadang si diang sayang,
Ikam kuhadang dibawa urang,

Sapala banar ikam nich,,! Saurang nang mananam, urang nang mamamam.
(LPBB/Sabran Tiga Empat)

Daun panjang daun halalang,
Daun palam ulah salipi,
Amun siang aku taganang,
Amun malam aku tamimpi,

Mimpi basah,,,(mimpi kaujanan di pahumaan.) hi hi hi
adiiing! Oh ading!
(LPBB/Sabran Tiga Empat)

Burung piungut hinggap di tihang,
Tinggi di awan tarbang sakawan,
Duduk maungut basangga wihang,
Hati dandaman kupandang bulan,
(LPBB/Sabran Tiga Empat)

Lading amas lading balati,
Lading balati manatak kantang,
Ading bungas jangan balaki,
Bulan haji kaka badatang,
(LPBB/Sabran Tiga Empat)

Kayuh baimbai ka hulu sungai,
Ampah ka kiri barakit panjang,
Galuh samampai maayun limbai,
Maulah hati maharit rindang,
(LPBB/Sabran Tiga Empat)

Ku cuba-cuba mancari jambu,
Jambu ku cari pisang ku dapat,
Ku cuba-cuba mancari balu,
Balu ku cari bujang ku dapat,

Untung ganal diakunya,,,gkgkgk
(LPBB/Putra Banua)

Handak bakodak di padang jarami,
Ka padang jarami jalannya lurus,
Lamun cinta lagi basemi,
Handak guring kaingatan tarus,
(LPBB/Lisa)

Nasi kuning iwak haruan,
Bajual nasi gelarnya sarjana,
Bagawian kada mangaruan.
Lamun hati gundah gulana,
(LPBB/Lisa)

Iwak pari bapundut daun,
Kucing lakas datang mamaraki,
Dini hari takajut bangun,
Ading bungas datang di mimpi,
(LPBB/Sabran Tiga Empat)

Ladingku amas ladingku panjang,
Kanapa pingkar patah kubuang,
Adingku bungas adingku sayang,
Batambah langkar imbah sumbahyang,
(LPBB/Sabran Tiga Empat)

Baju bakas dibariakan,
Baju hanyar dibarikan sayang,
Handak haja kada memikirakan,
Tapi inya salalu tabayang,
(LPBB/Lisa)

Panas-panasnya panas manggantang,
Manggantang rasa awak dipanggang,
Lawas-lawasnya lawas mahadang,
Mahadang cinta pabila datang,
(LPBB/Sabran Tiga Empat)

Kambang malati timbai ka laut,
Layu kambangnya balalu hanyut,
Dimapa hati kada kusut,
Malam minggu pasti taungut,
(LPBB/Ulvie)

Ampar tikar dalam jukung,
Siapa jua marabahinya,
Pian nang langkar mancung hidung,
Siapa jua nang ampunnya,

Hahayy..!!
(LPBB/Ulvie)

Bajukung di sungai andai,
Batarus sungai Baritu,
Hati bingung lawas baandai,
Awak kurus mahadang judu,
(LPBB/Sabran Tiga Empat)

Lamun jaruju padang jumampai,
Paikat laki dadayan kain,
Lamun jodoh baluman sampai,
Ading hadangi sampai takawin,
(LPBB/Ulvie)

Malam jumahat bajalan ka padu,
Bajalan ka padu ma’ambil timah,
Kasian haja bubuhab jumblu,
Malam minggu bagana di rumah,
(LPBB/Lisa)

Daun dadap banyak di padang,
Wanyi barumut di jati hutan,
Bulan kadap kada babintang,
Sunyi mamagut di hati rawan,
(LPBB/Sabran Tiga Empat)

Ampat lima kuriding patah,
Patah sabilah dihiga lawang,
Ampat lima ulun tanding sudah,
Kada manyama nang baju hirang,
(LPBB/Ulvie)

Mulai Garogot ka tamiang,
Ulih ulihnya sakarung pisang,
Taungut mahadang kaka datang,
Sudah datang diambil urang,
(LPBB/Ulvie)

Pandang pandang apa dipandang,
Apa dipandang di tangah hutan,
Hadang hadang dinda mahadang,
Kanda badatang lawan kuitan,
(LPBB/Risa Agustina)

Hari-hari duduk manulis,
Kada disangka kartasnya habis,
Napa hatiku rasa dihiris,
Mangganang inya nang hirang manis,
(LPBB/Lisa)

Buah kanas jangan dikupas,
Lamun dikuPas pakai parudan,
Assalamualaikum nang bungas bungas,
Salamat baisukan sabarataan,
(LPBB/Ulvie)

Gangan kaladi iwak bapanggang,
Sambalnya si buah kuini,
Jangan lagi ading mahadang,
Karna kanda sudah babini,
(LPBB/Incus Fatih)

Bapadah minta kambang mayang,
Kambangnya ampun raja,
Bapadah cinta bapadah sayang,
Sakalinya badusta haja,
(LPBB/Risa Agustina)

Umai panasnya paluh mambara,
Ngarannya musim imbah kataman,
Umai bungasnya galuh Martapura,
Urangnya alim tambah baiman,

Siapa jua nang jadi judunya,,,??? Mudahan Julak...ahayy
(LPBB/Sabran Tiga Empat)

Buat banyu ka dalam tajau,
Cibuk banyu di sumur balakang,
Duduk taungut pikiran layau,
Maingat ading diambil urang...

Nasibbb nasibb,,,taungut lakiannya,,,
(LPBB/Deden Zabuk Al-Pantun Banjari)

Labat-labatnya si daun pisang,
Labat lagi daun katapang,
Kada badapat hatiku mangganang,
Siang malam haur taganang,
(LPBB/Putra Banua)

Puhun pinang si puhun palam,
Puhun mingkudu batangnya bacabang,
Ulun taganang di wayah malam,
Asa handak lakas badatang,
(LPBB/Putra Banua)

Maulah rumah manyusun bata,
Kabalujuran gargaji tumpul,
Bujur haja diri ku cinta,
Duit jujuran balum takumpul,
(LPBB/Putra Banua)

Kayapa tulak ka tabuniau,
Jukung miris banyak balubang,
Kayapa guring kada ma'igau,
Kaka bajanji handak badatang,
(LPBB/Ulvie)

Itik halabiu nyaman dipanggang,
Mamanggang jangan diatas lantai,
Sahari ading kada kupandang,
Awak manggaring asa lunglai,
(LPBB/Moldi Haza)

Batang ulin jangan dirandam,
Tajak ka tanah diulah turus,
Handak haja mata bapajam,
Tapi hati mengganang tarus,
(LPBB/Lisa)

Makan sukun siang siang,
Makannya lawan tetangga,
Lamun kaka bujuran sayang,
Pabila jua kaka bapara,
(LPBB/Ulvie)

Tarung tatar buat di gangan,
Digangan akan lawan kaladi,
Dasar sakit hati mangganang,
Nang diganang sudah babini,
(LPBB/Ulvie)

Lamun handak manukar pita,
Nukar haja di warung Azak,
Lamun hati sudah cinta,
Banjarmasin Martapura tarasa parak...

Asa salingkangan tu pang jarak Banjarmasin Martapura ni...
Kaitu pang nang di alami ulih Abdul Aziz Al Jaboeli,,,hehe
(LPBB/Deden Zabuk Al-Pantun Banjari)

Jangan di tabang pisang jaranang,
Kalu rabah ke dadaian kain,
Jangan dihadang jangan diganang,
Ulun sudah dapat nang lain,
(LPBB/Zhulax Engot)

Makan sagu di palataran,
Kada batawaran lawan kuitan,
Malam minggu taungut saurangan,
Handak bajalan kada sing duitan,
(LPBB/Putra Banua)

Ulun handak makan kukulih,
Ada dijual dihiga salun,
Ulun handak pian mamilih,
Antara inya lawan ulun,
(LPBB/Risa Agustina)

Batang kaladi badaun dua,
Daun sarai buat ka bica,
Lamun jadi kita badua,
Kalambu tirai jandila kaca,
(LPBB/Putra Banua)

Paraya pian bakaca mata,,,
Amun kada jua bajalanan.
Paraya abang bapadah cinta,,,
Mun kada wani ka palaminan.
(LPBB/Risa Agustina)

Burung punai di dahan jati,
Ampar tikar di higa lawang,
Umai-umai sakitnya hati,
Malihat pacar digandeng urang,

Hahahahaaaapuk am,,,
(LPBB/Taufik Aza)

Burung tarabang kilam-kilaman,
Tarabang lalu hinggap ka jati,
Bulan tarang salau-salauan,
Tabayang aku si jantung hati,
(LPBB/Sabran Tiga Empat)

Bakalang lawan si buluh panjang
Wayah mamuai sarangnya wanyi
Batarang bulan basuluh bintang
Wayah kita baturai janji
(LPBB/Sabran Tiga Empat)

Cincirak burung cincirak,
Cincirak miring tarabang,
Dirusak jantung dirusak,
Dirusak ading tasayang,

Pialing burung pialing
Pialing tarbang malayang
Tagaring abang tagaring
Tagaring manyandang rindang

Oh pipit burung si pipit
Si pipit tarbang ka kolam
Kuharit rindang kuharit
Kuharit siang wan malam

(LPBB/Sabran Tiga Empat)

Buah manggis di dalam peti,
Bawa balayar dalam parahu,
Aku manangis di dalam hati,
Kadada saikung nang tahu.

Gasan apa lah pisang amas,
Lamun buahnya dimakan musang,
Gasan apa duit dan amas,
Lamun ading di ambil urang,

(LPBB/Zhulax Engot)

Pindua banyu di hulu,
Ka muhara larut palahan,
Badua wan adingku,
Ka KUA isuk banikahan,

Basanding panat duduk di palaminan,
Tangan kanan rancak basalaman,
Takurihing aku malihat adingku mandam,
Mamikirakan malam kalalambatan,

nang pina bapacaran lakasi haja nikah, rarampahan cagar naik pulang han,,,hehe
(LPBB/Deden Zabuk Al-Pantun Banjari)

Aku tahu taradak ading
Taradak ading di rapun sirih
Aku tahu kahandak ading
Kahandak ading lawan nang sugih
(LPBB/Sabran Tiga Empat)

Andak pati di higa lawang,
Lawang matan kayu japara,
Hati kaya dikarukut bidawang,
Umai sakit kada sakira,

Panas hati Adul Dugal imbah malihat Aluh Langkar bajalan baganding wan Anang Bungas....
(LPBB/Deden Zabuk Al-Pantun Banjari)

Tanah Minang ka Pulau Pandan,
Bagitik masih angin ka hulu,
Wayah rindang kutingau bulan,
Kubisik kasih di angin lalu,

Sudah ka Bintan ka Pariaman,
Di kanan kiri rapun kamangi,
Lumbah lautan tinggi gunungan,
Jalan baduri nang mahalangi,

Bila ka pantai lakasi taan,
mata nang basah cuba pang lapai,
Rasa am rakai hati wan badan,
Cinta disasah kada pang sampai,

(LPBB/Sabran Tiga Empat)

Amun handak ka rumah nini,
Bawa baras dalam karanjang,
Amun pian sudah babini,
Kanapa jadi bapadah bujang,
(LPBB/Risa Agustina)

Dicuba -cuba dipandang-pandang,
Amas parmata diulah galang,
Dilupa-lupa dibuang-buang,
Dasarnya cinta tatap taganang,

Urang lain kawa didustai, tapa siapa nang kawa mandustai hati saurang,,?
Ujar lakianx marista badan...
(LPBB/Sabran Tiga Empat)

Niau-ngiau kucing di lanting,
Kaujanan di Sungai Amandit,
Kiau-kiau kalawan ading,
Karindangan tulai maharit,
(LPBB/Sabran Tiga Empat)

Waluh masak nyaman digangan,
Sambal acan papuyu baubar,
Ulun dandaman ulun karindangan,
Saharian kakanda kadada habar,
(LPBB/Risa Agustina)

Haduk diulah sapanjang dapa,
Panjang bapanjang kita tataki,
Tunduk tingadah mahadang apa,
Hadang mahadang cinta sajati,

Kapala kuda nang dihambati,
Unta nang halus uyuh bajalan,
Pabila jua aku dapati,
Cinta nang tulus galuh baiman,

Ampar diampar alasnya tikar,
Lapikan habang gugur di pati,
Sabar basabar lawasnya sabar,
Mudahan datang panglipur hati,

(LPBB/Sabran Tiga Empat)

Kada ujarku tapi ujar urang,
Malam minggu malam nang panjang,
Muda-mudi parawan bujang,
Malapas rindu bakasih sayang,

Rami banar kudangar urang,
Ka hulu ka hilir asik bakunjang,
Maubati hati nang rindang,
Tuhuk maharit malam wan siang,

Wahai parawan wahai si bujang,
Sabalum apel baik sumbahyang,
Supaya iman kada bagoyang ,
Wayah badapat gandak tasayang,

(LPBB/Sabran Tiga Empat)